അത്ഭുതപ്പെടുത്തുന്ന രക്ഷാപ്രവർത്തനം; മലപ്പുറത്തെ പ്രശംസിച്ച് മേനക ഗാന്ധി... തിരിച്ചറിവ് വന്നതിൽ സന്തോഷമെന്ന് കേരളം.

മഹാമാരിക്കാലത്തു പറന്നിറങ്ങിയ ദുരന്തത്തിന്റെ നടുക്കത്തില്‍ നിന്നും നാട് മുക്തരായി വരുന്നേയുള്ളൂ. പരിമിതികളും തടസങ്ങളും വകഞ്ഞു മാറ്റി കരിപ്പൂര്‍ വിമാനാപകടം നടന്നയുടന്‍ സ്വന്തം സുരക്ഷ പോലും നോക്കാതെ രക്ഷാപ്രവര്‍ത്തനം നടത്തിയ നാട്ടുകാര്‍ക്കു നാടിന്റെ നാനാ ഭാഗങ്ങളില്‍ നിന്നും അഭിനന്ദപ്രവാഹമായിരുന്നു. മലപ്പുറം ജനതയുടെ നന്‍മ മനസിനെ പ്രശംസിച്ച് ബിജെപി എംപിയും മുന്‍ കേന്ദ്രമന്ത്രിയുമായ മേനക ഗാന്ധിയും രംഗത്തെത്തി.
മുസ്ലിം യൂത്ത് ലീഗ് നേതാവ് നൽകിയ ഇ-മെയിൽ സന്ദേശത്തിനു മറുപടി ആയാണ് മേനക ഗാന്ധിയുടെ അഭിന്ദനം
കരിപ്പൂര്‍ വിമാനദുരന്തമുണ്ടായപ്പോള്‍ അദ്ഭുതപ്പെടുത്തുന്ന തരത്തിലാണ് രക്ഷാപ്രവര്‍ത്തനവുമായി മലപ്പുറത്തെ ജനങ്ങള്‍ എത്തിയത്. ഈ മനുഷ്യത്വം ഇനിയും പ്രതീക്ഷിക്കുന്നു. ഇത് നിലനിര്‍ത്തണമെന്നും മേനക ഇ – മെയില്‍ സന്ദേശത്തില്‍ പറയുന്നു. മേനക ഗാന്ധിക്ക് മൊറയൂർ പഞ്ചായത്ത്‌ യൂത്ത് ലീഗ് ജനറൽ സെക്രട്ടറി അയച്ച ഇ-മെയിൽ സന്ദേശത്തിനുള്ള മറുപടിയിലാണ് മലപ്പുറത്തെ പ്രശംസിച്ചത്.
മുമ്പ് പാലക്കാട് ജില്ലയിൽ സ്‌ഫോടക വസ്തു കഴിച്ചു ആന ചെരിഞ്ഞ സംഭവത്തിൽ മലപ്പുറത്തെ കുറിച്ചുള്ള മനേക ഗാന്ധിയുടെ പരാമര്‍ശത്തിനെതിരെയും മൊറയൂർ ‌ യൂത്ത് ലീഗ് കമ്മിറ്റി പ്രതിഷേധ ഇമെയിൽ അയച്ചിരുന്നു.