ത്യശൂരിൽ വൻ ജ്വല്ലറി കവർച്ച; മൂന്നര കിലോ സ്വർണാഭരണങ്ങൾ കൊള്ളയടിച്ചു.

 ത്യശൂർ: കയ്പമംഗലം മൂന്നുപീടികയിൽ വൻ ജ്വല്ലറി കവർച്ച. ഭിത്തി തുരന്ന് മൂന്നര കിലോ സ്വർണാഭരണങ്ങൾ കൊള്ളയടിച്ചു. തൃശൂർ മൂന്നുപീടിക ഗോൾഡ് ഹാർട്ട് ജ്വല്ലറിയിലായിരുന്നു കവർച്ച. രാവിലെ 10 മണിയോടെ ജ്വല്ലറി തുറക്കാനെത്തിയ ഉടമ സലിമാണ് കവർച്ച വിവരം ആദ്യം അറിയുന്നത്. ജ്വല്ലറിയുടെ ഒരു വശത്തെ ഭിത്തി തുരന്നാണ് മോഷ്ടാക്കൾ അകത്ത് കടന്നിട്ടുള്ളത്. ലോക്കറിൽ സൂക്ഷിച്ചിരുന്ന സ്വർണമാണ് നഷ്ടപ്പെട്ടിട്ടുള്ളത്.ജ്വല്ലറി ഉടമയും ഒരു ജീവനക്കാരനും മാത്രമാണ് കടയിലുണ്ടാകാറുള്ളത്.

ഇന്നലെ രാത്രി 9 മണിക്കാണ് ജ്വല്ലറി പൂട്ടി പോയത്. മോഷണം നടത്തിയതിന് ശേഷം ജ്വല്ലറിയ്ക്കകത്ത് തെളിവുകൾ നശിപ്പിക്കുന്നതിനായി മുളക് പൊടി വിതറിയിട്ടുണ്ട്. ദേശീയപാതയോട് ചേർന്ന് പ്രവർത്തിക്കുന്ന ജ്വല്ലറിയുടെ വലത് വശം പുല്ലുകൾ നിറഞ്ഞ് കാട് പിടിച്ച് കിടക്കുന്ന അവസ്ഥയിലാണ്. ഈ ഭാഗത്ത് കൂടെയാണ് മോഷ്ടാക്കൾ എത്തി ഭിത്തി തുരന്നിട്ടുള്ളത്.
ഏകദേശം രണ്ടടിയോളം വലുപ്പത്തിലാണ് ഭിത്തി തുരന്നിരിക്കുന്നത്.

ഇരിങ്ങാലക്കുട ഡി.വൈ.എസ്.പി ഫേമസ് വർഗീസിന്റെ നേതൃത്വത്തിലുള്ള പൊലീസ് സ്ഥലത്തെത്തി അന്വേഷണം ആരംഭിച്ചു. ഡോഗ് സ്ക്വാഡും, വിരലടയാള വിദഗ്ധരും സ്ഥലത്തെത്തി തെളിവുകൾ ശേഖരിച്ചു. ജ്വല്ലറിയിലെ സിസിടിവി തകരാറിലായിരുന്നു. സമീപത്തെ കെട്ടിടങ്ങളിലെ സിസിടിവി കാമറകൾ പരിശോധിച്ചു വരികയാണ്. കവർച്ചാ സംഘത്തിൽ ഒന്നിൽ കൂടുതൽ ആളുകളുണ്ടെന്നാണ് സൂചന.