ശീതളപാനീയങ്ങൾക്ക് അടിമകളാണെങ്കിൽ വ്യായാമം ചെയ്തിട്ടും കാര്യമില്ല, ഹൃദയാരോഗ്യം നശിക്കും

മധുരമാർന്ന ശീതളപാനീയങ്ങൾക്ക് അടിമകളായിട്ടുള്ളവർ നിരവധിയാണ്. ആഡഡ് ഷുഗർ അമിതമായ അളവിലുള്ള ഇവ കുടിക്കുക വഴി അമിതവണ്ണം, പ്രമേഹം, ഹൃദ്രോഗങ്ങൾ, രക്തസമ്മർദം തുടങ്ങിയവയ്ക്കുള്ള സാധ്യത കൂടുതലാണെന്ന് നിരവധി പഠനങ്ങൾ തെളിയിച്ചിട്ടുണ്ട്. ചിലരാകട്ടെ ഇത്തരത്തിലുള്ള മധുരപാനീയങ്ങൾ നിരന്തരം കുടിക്കുമ്പോഴും മതിയായ വ്യായാമം ചെയ്യുന്നുണ്ടല്ലോയെന്ന് മറുന്യായം പറയുന്നവരാണ്. എന്നാൽ അതുകൊണ്ടൊന്നും കാര്യമില്ലെന്നു വ്യക്തമാക്കുകയാണ് ഒരു പഠനം. എത്രതന്നെ വ്യായാമം ചെയ്യുന്നവരാണെങ്കിലും മധുരമാർന്ന ശീതളപാനീയങ്ങൾ നിരന്തരം കുടിക്കുന്നവരാണെങ്കിൽ ഹൃദയാഘാതത്തിനുള്ള സാധ്യത കൂടുതലാണെന്നാണ് പഠനത്തിൽ പറയുന്നത്.

ഹാർവാർഡ് സർവകലാശാലയിൽ നിന്നുള്ള ഗവേഷകരാണ് പഠനത്തിനു പിന്നിൽ. പഞ്ചസാര പാനീയങ്ങൾ കുടിക്കുന്നവരാണെങ്കിൽ ആഴ്ച്ചയിൽ 150 മിനിറ്റ് വ്യായാമം ചെയ്താലും കാര്യമില്ലെന്നാണ് ഗവേഷകർ പറയുന്നത്. ഹൃദ്രോഗങ്ങളെ പ്രതിരോധിക്കാൻ ലോകാരോഗ്യസംഘടന നിർദേശിക്കുന്നത് ആഴ്ച്ചയിൽ 150 മിനിറ്റ് വ്യായാമം ചെയ്യണമെന്നാണ്. എന്നാൽ വ്യായാമം കൊണ്ടുമാത്രം കാര്യമില്ലെന്നു വ്യക്തമാക്കുകയാണ് ഈ ഗവേഷകർ.

ആഴ്ച്ചയിൽ രണ്ടുതവണയിലേറെ ഇത്തരം പാനീയങ്ങൾ കുടിക്കുന്നവരിൽ ഹൃദ്രോഗസാധ്യത കൂടുതലാണെന്ന് ഗവേഷകർ പറയുന്നു. ഏകദേശം ഒരുലക്ഷത്തോളം പേരുടെ ആരോഗ്യവിവരങ്ങൾ ശേഖരിച്ചാണ് പഠനം നടത്തിയത്. ആഴ്ച്ചയിൽ രണ്ടുതവണമാത്രം ഇവ കുടിക്കുന്നു എന്നത് ചെറിയതോതല്ലേ എന്നു കരുതുമ്പോഴും അവയ്ക്ക് ഹൃദയാരോഗ്യത്തെ വിപരീതമായി ബാധിക്കാൻ കഴിയുമെന്നാണ് ഗവേഷകർ പറയുന്നത്. മാത്രമല്ല എത്രത്തോളം ഇവ കുടിക്കുന്നതിന്റെ അളവ് കൂടുന്നോ അതിനനുസരിച്ച് ഹൃദയാരോഗ്യം അപകടകരമാകാം എന്നും ഗവേഷകർ പറയുന്നുണ്ട്.