ടി20 ലോകകപ്പ് 2024: ദക്ഷിണാഫ്രിക്കയെ വിറപ്പിച്ച് നേപ്പാള്‍, ഒരു റൺസിന്റെ തോൽവി; തിരിച്ചടിയായത് പരിചയക്കുറവ്

ടി20 ലോകകപ്പിലെ ആവേശകരമായ പോരാട്ടത്തില്‍ ദക്ഷിണാഫ്രിക്കയെ വിറപ്പിച്ച് കീഴടങ്ങി നേപ്പാള്‍. മത്സരത്തില്‍ ഒരു റണ്‍സിനാണ് നേപ്പാള്‍ കീഴടങ്ങിയത്. ആദ്യം ബാറ്റ് ചെയ്ത ദക്ഷിണാഫ്രിക്ക 7 വിക്കറ്റിന് 115 റണ്‍സെടുത്തപ്പോള്‍ മറുപടി ബാറ്റിംഗിനിറങ്ങിയ നേപ്പാള്‍ 7 വിക്കറ്റ് നഷ്ടത്തില്‍ 114 റണ്‍സിലൊതുങ്ങി. തബ്രൈസ് ഷംസിയുടെ ബോളിംഗാണ് ദക്ഷിണാഫ്രിക്കയെ രക്ഷിച്ചത്.

ടോസ് നേടിയ നേപ്പാള്‍ ദക്ഷിണാഫ്രിക്കയെ ആദ്യം ബാറ്റ് ചെയ്യാന്‍ അയക്കുകയായിരുന്നു. റീസ ഹെന്‍ഡ്രിക്സാണ് ദക്ഷിണാഫ്രിക്കയുടെ ടോപ് സ്‌കോറര്‍. താരം 49 പന്തില്‍ 5 ഫോറും 1 സിക്സും ഉള്‍പ്പെടെ 43 റണ്‍സെടുത്തു. എയ്ഡന്‍ മാര്‍ക്രം 15, ട്രിസ്റ്റണ്‍ സ്റ്റബ്‌സ് 27 എന്നിവരാണ് രണ്ടക്കം കടന്ന മറ്റ് രണ്ട് താരങ്ങള്‍. നേപ്പാളിനായി കുശാല്‍ ബൂര്‍ട്ടല്‍ 4 ഓവറില്‍ 19 റണ്‍സ് വിട്ടുകൊടുത്ത് 4 വിക്കറ്റ് വീഴ്ത്തി. ദിപേന്ദ്ര സിംഗ് ഐറേ മൂന്ന് വിക്കറ്റും വീഴ്ത്തി.

49 പന്തില്‍ 4 ഫോറും 1 സിക്സും ഉള്‍പ്പെടെ 42 റണ്‍സെടുത്ത ആസിഫ് ഷെയ്ഖാണ് നേപ്പാളിന്റെ ടോപ് സ്‌കോറര്‍. 18ാം ഓവറില്‍ താരത്തെ ഷംസി പുറത്താക്കിയതോടെയാണ് കളി ദക്ഷിണാഫ്രിക്കയുടെ വരുതിയിലായത്.

ഒന്നാം വിക്കറ്റില്‍ കുശാല്‍ ബൂര്‍ട്ടലും ആസിഫ് ഷെയ്ഖും ചേര്‍ന്ന് 35 റണ്‍സിന്റെ കൂട്ടുകെട്ടുണ്ടാക്കി. 21 പന്തില്‍ 1 സിക്സും ഫോറും ഉള്‍പ്പെടെ 13 റണ്‍സെടുത്ത ബൂര്‍ട്ടലിനെ തബ്രൈസ് ഷംസി ക്ലീന്‍ബൗള്‍ഡ് ചെയ്തു. നായകന്‍ രോഹിത് പൗഡലിനെ (0) ഷംസി ഡെക്കിന് പുറത്താക്കി. അനില്‍ സഹ് 24 പന്തില്‍ 3 ഫോറും 1 സിക്സും ഉള്‍പ്പെടെ നിര്‍ണ്ണായകമായ 27 റണ്‍സ് നേടി.

അവസാന പന്തില്‍ ഗുല്‍സന്‍ ജാ (6) റണ്ണൗട്ടായതായാണ് നേപ്പാളിനെ തോല്‍പ്പിച്ചത്. ദക്ഷിണാഫ്രിക്കയ്ക്കായി തബ്രൈസ് ഷംസി നാല് വിക്കറ്റും ആന്‍ റിച്ച് നോക്കിയേ, എയ്ഡന്‍ മാര്‍ക്രം എന്നിവര്‍ ഓരോ വിക്കറ്റു വീതവും വീഴ്ത്തുകയും ചെയ്തു.